ГАЗА (АА) – Најмалку седуммина Палестинци загинаа во најновото израелско бомбардирање врз Појасот Газа, соопшти Агенцијата за цивилна одбрана, јавува Анадолу.
Четири лица ги загубија животите, а повеќемина се повредени кога израелски борбен авион погодил штанд за храна во Ал-Шова, источно од градот Газа, изјави портпаролот Махмуд Басал за Анадолу.
Уште три лица загинаа во израелско гранатирање врз јужниот град Рафа, додаде тој.
Цел на артилериските гранатирања биле и населбите Зејтун и Ал Сабра во градот Газа, но сè уште нема информации за жртви.
Новите напади се случија неколку часа по убиството на најмалку 40 Палестинци и десетици повредени во израелските воздушни напади врз шаторскиот камп во Кан Јунис во подрачјето на Ал-Маваси, кој Израел го означи како „хуманитарна зона“ за раселените цивили во Газа.
Израел продолжува со бруталната воена офанзива врз Појасот Газа по нападот на Хамас на 7 октомври и покрај резолуцијата на Советот за безбедност на ОН со која се бара итен прекин на огнот.
Според локалните здравствени власти, оттогаш се убиени речиси 41.000 Палестинци, главно жени и деца, а 94.800 се повредени.
Воената офанзива и континуираната блокада на енклавата доведе до сериозен недостиг на храна, чиста вода и лекови, а голем дел од регионот е во урнатини.
Израел се соочува со обвинувања за геноцид за неговите акции во Газа пред Меѓународниот суд на правдата.
Извор: Anadolu Agency (AA)
