ГАЗА (АА) – Најмалку 28 Палестинци се убиени, а десетици се повредени во нов израелски напад врз училиште во кое се засолнети раселените цивили во централниот дел на Појасот Газа денес, соопшти Министерството за здравство, јавува Анадолу.
Околу 54 лица се повредени во нападот што го имаше за цел училиштето Руфаида во градот Деир ал Балах, се додава во соопштението на Министерството.
„Окупациската армија беше свесна дека илјадници раселени деца и жени кои биле оттргнати од нивните домови се засолнети во ова училиште“, соопшти владината канцеларија за медиуми на Газа.
Според канцеларијата за медиуми, околу 190 засолништа биле бомбардирани од израелската Армија од избувнувањето на израелската војна во Газа на 7 октомври 2023 година.
„Ова ново злосторство доаѓа во време кога здравствената состојба во централна Газа, каде што живеат повеќе од еден милион луѓе, е веќе тешка“, се додава.
Израел систематски гаѓаше цивилни објекти, вклучително и училишта, болници и места за богослужба, во време на неговата тековна офанзива на Појасот Газа.
Според правилата за војна, нишанењето такви цивилни објекти може да претставува воено злосторство.
Израел продолжува со својата брутална офанзива врз Појасот Газа и покрај резолуцијата на Советот за безбедност на ОН со која се бара итен прекин на огнот.
Според локалните здравствени власти, оттогаш се убиени повеќе од 42.000 луѓе, главно жени и деца, а над 97.700 се повредени.
Израелските напади се причина за раселување на речиси целото население во Појасот Газа, а тековната блокада доведе до сериозен недостиг на храна, чиста вода и лекови.
Израел се соочува со обвинение за геноцид пред Меѓународниот суд на правдата за неговите акции во Газа.
Извор: Anadolu Agency (AA)
