МЕКСИКО СИТИ (АА) – Најмалку 192 лица се убиени во бранот насилства што започна минатиот месец меѓу завојуваните наркобанди во северозападната мексиканска држава Синалоа, соопшти Државниот совет за јавна безбедност, локално граѓанско набљудувачко тело, јавува Анадолу.
Советот, кој се состои од членови на синалоанското општество, како што се универзитетска фела, бизнис-претставниците и непрофитните организации, соопшти дека до денес се пријавени речиси 200 убиства и 226 исчезнувања од почетокот на насилствата на 9 септември.
Околу 200 семејства избегаа од насилствата, при што се затворени 180 бизниси, а 2.000 работни места се изгубени поради вооружениот конфликт меѓу водечките фракции на картелот Синалоа.
По апсењето на злогласниот крал на дрогата и коосновач на картелот Синалоа, Исмаел „Ел Мајо“ Замбада на 25 јули, се случи насилна промена во динамиката на моќта на картелот основан од Замбада и Хоакин „Ел Чапо“ Гузман, кој отслужува доживотна казна во американски затвор.
Откако 70-годишниот Замбада беше приведен од американските власти во Ел Пасо, Тексас, синовите и наследниците на Ел Чапо, втора сила по големина во картелот, наречена Чапитос, започнаа насилно зграпчување на власта и брутална војна во нивниот роден град Синалоа.
Приврзаниците на Чапитос и Замбада ги мобилизираа своите трупи, а гувернерот на Синалоа, Рубен Роча Моја, минатата недела објави дека 590 војници на Националната гарда влегле да ја заштитат сојузната држава.
„Се надеваме дека ќе ни помогнат… Националната гарда, воздухопловните сили, морнарицата и државната полиција, исто така, се исклучително координирани во својата работа, што ни помогна да го намалиме (насилството). За жал, сепак, не може да кажеме дека е целосно решено“, рече тој.
Извор: Anadolu Agency (AA)
