Над 140 лица хоспитализирани во Русија поради најголемата епидемија на ботулизам во последните 30 години

МОСКВА (АА) – Руските санитарни власти денес соопштија дека 145 лица со ботулизам се хоспитализирани во три руски градови, опишувајќи ја ситуацијата како „најголема епидемија“ на оваа зараза во последните 30 години, јавува Анадолу.

Федералната служба за надзор на заштитата и благосостојбата на потрошувачите (Роспотребнадзор) соопшти дека во главниот град Москва медицинска помош побарале 121 лице, од кои 55 се во тешка состојба, а 30 на интензивна нега.

Санитарните власти на градовите Казан и Нижни Новгород на реката Волга пријавиле по 12 случаи на ботулизам.

„Заразените лица од сите три градови нарачале специфична храна, лобио и салата со туна, грав и јаболка, од две локални компании, „Local Kitchen“ и „GastroPort“, соопшти Роспотребнадзор, истакнувајќи дека е донесена одлука да се прекине работата на овие компании до завршување на увидот кој е во тек.

Руската истражна комисија објави дека по инцидентот е отворена кривична постапка, дека три лица се приведени во Москва, меѓу кои и генералниот директор на „Local Kitchen“. Оттаму додаваат дека при увидот вработените во споменатите фирми се обиделе да се ослободат од залихите на храна кои наводно го предизвикале труењето.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.