РИМ (АА) – Повеќе од 1.200 нерегуларни мигранти пристигнаа на италијанскиот остров Лампедуса во последните 24 часа, објавија денес италијанските медиуми, пренесува Анадолу.
„Моментниот број на нерегуларни мигранти во центарот за чекање на островот изнесува 1.430, а се очекува да бидат испратени во други региони“, објави телевизијата Раињуз 24.
Министерството за внатрешни работи со чамци ќе ги пренесе мигрантите во други италијански градови.
Според статистичките податоци на италијанското МВР, од 1 јануари досега во Италија пристигнале 147.239 нерегуларни мигранти. Минатата година нивниот број изнесуваше 92.881.
Лампедуса е прво копно на кое во Европа стапнуваат речиси 70% од мигрантите што доаѓаат по морски патишта.
На островот повремено се забележуваат засилени миграциски текови, а последниот се случи во периодот од 11 до 17 септември, со околу 11.000 нерегуларни мигранти.
Локалните власти прогласија вонредна состојба, а претседателката на Европската комисија, Урсула фон дер Лајен, го посети островот за да го објави планот за поддршка на Италија.
Средоземното Море (Медитеранот) е важна маршрута за нерегуларните миграции кон Европа.
Чамците преполни со мигранти кои бараат помош обично ги спасуваат европските невладини организации наместо европските власти.
