На Болсонаро му e забрането да се кандидира за претседател на Бразил до 2030 година

Четворица од седумте судии на повисокиот изборен суд гласаа за протерување на екстремно десничарскиот радикал, кој немилосрдно ги оцрнуваше бразилските демократски институции за време на неговиот неуспешен обид за втор мандат

Политичката иднина на поранешниот бразилски претседател Жаир Болсонаро е доведена во прашање откако изборните судии изгласаа да му се забрани во наредните осум години да се кандидира за претседател поради злоупотреба на својата моќ и ширење „ужасни лаги“ за време на минатогодишните избори.

Четворица од седумте судии на повисокиот изборен суд гласаа за протерување на екстремно десничарскиот радикал, кој немилосрдно ги оцрнуваше бразилските демократски институции за време на неговиот неуспешен обид за втор мандат.

Еден судија гласаше против одлуката, а двајца треба да гласаат подоцна денеска. Но, гласовите на тие двајца судии нема да бидат доволни за промена на одлуката, пишува Гардијан.

Гласањето значи дека Болсонаро, кој ги загуби минатогодишните избори од неговиот левичарски ривал Луис Инасио Лула да Силва, нема да може повторно да бара избрана функција до 2030 година, кога ќе има 75 години.

Потегот да му се одземат политичките права на Болсонаро се заснова на неговата многу контроверзна одлука да покани странски амбасадори во неговата официјална резиденција минатиот јули, 11 недели пред првиот круг од изборите на 2 октомври.

Тогаш Болсонаро изнесе неосновани тврдења против бразилскиот електронски систем за гласање што предизвика гнев во јавноста. Еден судија на Врховниот суд ги оцени тврдењата на Болсонаро како политички мотивирани дезинформации.

Адвокатот на Болсонаро рече дека тонот на неговиот клиент на состанокот со амбасадорите можеби бил несоодветен и премногу отворен, но дека тој го кажувал тоа за да го подобри системот на гласање во Бразил.

Пред минатогодишните избори во Бразил, кои предизвикаа длабоки поделби во земјата, популистот кој му се восхитува на Доналд Трамп постојано ги напаѓаше електронските гласачки машини во Бразил. Болсонаро инсинуираше дека може да го отфрли изборниот резултат ако го смета гласањето за нефер, пишува Гардијан.

Милиони следбеници ја прифатија идејата на Болсонаро и на 8 јануари оваа година, една недела по инаугурацијата на новиот претседател Лула, илјадници приврзаници на Болсонаро упаднаа во претседателската палата. Влегоа и во Конгресот и во Врховниот суд со цел да ги поништат изборите.

„Идејата беше да се ослободиме од Лула“,

изјави еден од учесниците за „Гардијан“ утрото по нападот во главниот град Бразилија.