Женската одбојкарска репрезентација на Македонија на 20.јули во 12 часот стартува нов циклус подготовки за квалификациите за ЕП 2026. Селекторот Стефан Пауновиќ го „скрати“ списокот на 18 одбојкарки, кои ќе треба да се појават во Маврово.
Пауновиќ се потпира на веќе проверени сили, со оглед на тоа дека сите овие одбојкарки беа дел од претходната акција, односно настапија во некој од шестте натпревари од Европската Сребрена лига минатиот месец. Исклучок се коректорите Мери Бошковска, која поради повреда го пропушти комплетното учество и Андротеа Милевска, која ги одработи подготовките со А селекцијата, а потоа ја предводеше репрезентацијата до 19 години на Балканскиот шампионат во Тирана, Албанија.
Една недела одбојкарките на Македонија ќе бидат во Маврово, а потоа ќе продолжат во Скопје каде ќе тренираат уште една недела до првиот квалификациски натпревар со Грција на 3.август во СЦ „Борис Трајковски“ во Скопје. Натпреварот против Австрија се игра на 9.август во Виена. (МИА)
Извор: kurir.mk
