АНТАЛИЈА (АА) – Министерот за надворешни работи и надворешна трговија, Тимчо Муцунски, денес се обрати на панел-дискусијата „Згрижување на регионот за просперитетна иднина на Балканот“, во рамките на 4. издание на Анталија Дипломатскиот Форум, кој се одржува во Анталија, Република Туркије, известува Анадолу.
На 4. Форум за дипломатија во Анталија (ФДА2025), чијшто Агенција Анадолу (AA) е „Глобален партнер за комуникации“, се одржа панел под наслов „Згрижување на регионот за просперитетна иднина на Балканот“, чиј модератор беше генералниот секретар на Регионалниот совет за соработка (РСС) Амер Капетановиќ. На панелот присуствуваа Тимчо Муцунски, министерот за надворешни работи и надворешна трговија на Северна Македонија, Ервин Ибрахимовиќ, вицепремиер и одговорен за меѓународни односи на Црна Гора, Елмедин Конаковиќ, министер за надворешни работи на Босна и Херцеговина, Марко Ѓуриќ, министерот за надворешни работи на Република Србија и Мехмет Кемал Бозај, заменик министер за надворешни работи на Туркије.
Во своето обраќање, министерот Муцунски ја истакна интеграцијата во Европската Унија како стратешка цел на државата, а унапредувањето на регионалната соработка како клучен приоритет на македонската надворешна политика. Тој порача дека Западен Балкан не е проблем што треба да се менаџира, туку регион подготвен за напредок – не периферија, туку суштински дел од европската сегашност и иднина.
Шефот на македонската дипломатија ја нагласи потребата од јасен и опиплив пат напред кон полноправно членство во Европската Унија, како и значењето на регионалната политичка, економска и безбедносна одговорност. Во тој контекст, се осврна и на трагедијата во Кочани, посочувајќи ја како пример за важноста на блискоста со соседите и силата на солидарноста.
Министерот Муцунски посебно го нагласи значењето на вложувањето во човечкиот капитал, јакнењето на конкурентноста на приватниот сектор и промоцијата на регионалните вредносни синџири како предуслов за одржлив раст.
Извор: Anadolu Agency (AA)
