СКОПЈЕ (АА) – Вулканот Поас во Костарика предизвика најинтензивна ерупција оваа година, исфрлајќи пепел и гас што достигна височина над 2.000 метри над кратерот, јавува Анадолу.
Според податоците на Волканолошко-сеизмолошката опсерваторија на Костарика (ОВСИКОРИ), ерупцијата траела 10 минути, а пепелта достигнала 4.708 метри надморска височина. Поради силниот ветер пепелта се проширила и била забележана во неколку региони, меѓу кои Зарсеро, Гресија, Алахуела, Хередија и Сан Хозе.
Експертите од ОВСИКОРИ предупредуваат на зголемена сеизмичка активност и високо ниво на емисии на сулфур диоксид – повеќе од 600 тони дневно, што укажува на можност за нови ерупции. Вулканологот Жефроа Авард објасни дека активноста е поттикната од езеро во кратерот, познато како Лагуна Калиенте.
Националната комисија за вонредни состојби (CNE) ја продолжи портокаловата тревога за Националниот парк „Поас“, кој е затворен за посетители од 28 март, а зелената тревога останува активна за околните општини. Надлежните им препорачаа на жителите да носат маски Н95 и да останат во затворен простор за да избегнат здравствени ризици.
Наедно упатија остро предупредување за нелегално приближување до кратерот поради нестабилен терен и присуство на токсични гасови.
И американската амбасада во Сан Хозе ги советуваше граѓаните да го избегнуваат подрачјето сè додека не се подобрат условите.
Извор: Anadolu Agency (AA)
