Премиерот Христијан Мицкоски е зачуден за реакција на грчкото МНР, во кое Грција потсетува дека ‘за дополнителниот напредок во билатералните односи со Северна Македонија и непреченото продолжување на европскиот пат на соседната земја предуслов е целосното почитување на Договорот од Преспа и секако воздржување од иредентистички декларации и претензии кон соседните земји’.
Мицкоски вечерва во интервју за МТВ, рече, ‘од каде тие се почувствувале повикани кога никој не беше споменат во таа моја изјава’.
„Мојата цел и мојата порака е јасна. Како претседал на Влада би било неодговорно и предавнички кон македонскиот народ, кон македонските граѓани, јас да кажам дека македонското прашање е затворено во услови кога ние не сме дел од европското семејство, а патот сме го почнале многу пред можеби некои земји – членки кои се таму и тоа е прашање што стои отворено“, рече Мицкоски.
Според Мицкоски, главната причина за неуспехот се билатералните прашања што не би требало да бидат критериуми и услови.
„Посуштинско прашање, е дека не можеме ние да кажеме дека македонското прашање е затворено кога Судот за човекови права има донесено одлуки и пресуди за Македонците од другата страна на границата во Бугарија, кои велат дека бугарското општество не ги почитува елементарните човекови права кон македонската заедница таму“, рече Мицкоски.
Реакцијата од грчкото МНР доаѓа по изјавата на премиерот Мицкоски од САД во која рече дека „треба да победуваме и во Вашингтон, Брисел, Берлин, Лондон, Париз, Рим и други светски метрополи ако сакаме македонското прашање конечно да добие своја разврска бидејќи тоа не е решено, тоа со векови тлее и трае и сè уште постои“.
Изјавата на премиерот ја пренесоа голем дел од грчките медиуми, коментирајќи дека „Мицкоски провоцира“ и говори за „нерешено прашање“.
Со реакција излегоа и од опозициската СИРИЗА во која велат дека „ги осудуваат изјавите на премиерот на Република Северна Македонија“ и ја повикуваат Владата на Мицотакис „динамично да реагира на ова ново провокативно дејствие“, за кое посочуваат дека е „во спротивност со Договорот од Преспа“.
„Ги повикуваме премиерот на Северна Македонија и сестринската партија на Нова демократија во ЕПП, ВМРО, конечно да разберат дека континуираните прекршувања на Договорот од Преспа и националистичките изјави што ги даваат го кршат и меѓународното право и европското законодавство и ќе имаат сериозни последици и во билатералните односи и во европската перспектива на Северна Македонија“, пишува во соопштението од СИРИЗА.
ИЗВОР: racin.mk
