Советот за соработка на високо ниво е значаен чекор за односите меѓу двете држави чија цел е продлабочување и интензивирање на соработката во сите области од заеднички интерес, истакна премиерот Мицкоски на заедничката прес конференција со Ердоган. Тој истакна дека Турција е еден од нашите најзначајни економски партнери и дека целта е да се зголемат турските инвестиции во Македонија, но и да се создадат можности за македонските компании на турскиот пазар.
„Веќе имаме многу позитивни примери на турски компании кои работат кај нас, во делот на патната и железничката инфраструктура, а од друга страна неодамна и како што објавивме имаме соработка во делот на енергетиката со значајна и голема турска компанија за инвестиции во изградбата на когенеративни гасни централи, топловодна и гасна мрежа во висина од, би рекол, до една милијарда долари“, вели Христијан Мицкоски.
Турскиот претседател Ердоган истакна дека трговската размена меѓу двете земји треба да се унапреди, а во разговорите станало збор и за подобрување на соработката во воената област. Тој ја потенцираше важноста на турската заедница во земјава и рече дека нашите односи се јаки како и Камениот мост во Скопје.
„Минатата година ние имавме околу една милијарда долари трговска размена и мислам дека во првата прилика мораме да ја подобриме и да ја донесеме двострано. Помеѓу двете земји постоењето на Спогодбата за слободна трговија мислам дека треба повторно да се ревидира. Понатаму мислам дека односите кои што ги имаме особено во воената област и во сферата на одбранбената индустрија мислам дека и на нив денеска добро се осврнавме. Нашите односи над 30 години се исто јаки како што е јак камениот мост во Скопје“, вели Реџеп Таип Ердоган.
Во разговорите Ердоган не изостави да ја спомене и ФЕТО, за што рече дека заедничкото пријателство е под притисок на оваа организација. Воедно станало збор и за состојбата со војната во Украина за што оцениле дека треба да се реши по пат на преговори, како и за Палестина за што се согласиле дека овој отворен конфликт треба да се надмине со формирање две држави.
ИЗВОР: ТВ 21
