Гевгелија денес беше домаќин на свечено пуштање во употреба на новата обиколница – улицата „Свети Климент Охридски“, капитален инфраструктурен проект во вредност од над 120 милиони денари (околу 2 милиони евра). Новиот западен булевар претставува значајна сообраќајна артерија која, според премиерот Христијан Мицкоски, ќе придонесе за подобар економски и секојдневен живот во градот.
„Ова не е само нов асфалт, туку симбол на решителноста дека ветувањата се даваат за да се исполнат. Со овој проект, што беше дел од програмата уште во 2021 година, денес гледаме дека зборот станува дело“, изјави премиерот.
Покрај оваа улица, во тек се и други значајни инфраструктурни зафати во општината. Се реконструира дел од булеварот „Гевгелија“, заедно со натпатникот на улицата „Железничка“ и дел од железничката пруга – проект со вредност од над 25 милиони денари. Во завршна фаза е и изградбата на кружна крстосница на влезот во градот, со нов мост над каналот „Рауљ“, инвестиција вредна повеќе од 27 милиони денари.
Мицкоски ја искористи приликата да упати благодарност до градоначалникот на Гевгелија за неговата посветеност и соработка со централната власт. „Кога локалната самоуправа и Владата се партнери, резултатите не изостануваат“, порача премиерот.
Во своето обраќање, тој нагласи дека времето на злоупотреби и расипничко трошење на јавните пари е минато, а сега секој денар се гледа на терен преку конкретни проекти кои го подобруваат животот на граѓаните.
„Испраќаме јасна порака – продолжуваме да вложуваме, да градиме, да го менуваме лицето на секој град, село и општина. Ветивме и ветувањата ги исполнуваме“, истакна Мицкоски, честитајќи го отворањето на новата улица и посакувајќи таа да донесе безбедност, развој и гордост за Гевгелија.
ИЗВОР: ТВ 21
