Премиерот Христијан Мицкоски изјави дека очекува утре да бидат објавени податоци кои ќе ја потврдат успешноста на владините политики, посебно во поглед на октомврискиот буџетски суфицит од 1,125 милијарди денари, што е прв таков по долги години.
Мицкоски нагласи дека октомври бил првиот месец по долго време кога државата завршила со суфицит. Според него, ова е значаен резултат кој потврдува дека економските мерки даваат резултати.
Утре се очекуваат нови податоци за трошоците на живот, како и есенските макроекономски показатели од Народната банка. Премиерот потврди дека државата успешно се претставува на меѓународната сцена и дека резултатите се веќе видливи, особено по средбите со глобалните лидери како канцеларот Шолц и соработниците на новоизбраниот претседател на САД, Доналд Трамп.
Мицкоски ја оцени средбата со американските претставници како историска шанса која не треба да се пропушти, истакнувајќи дека државата мора да го искористи овој момент на достоинствен и правилен начин.
Тој апелираше за решителни чекори кон економски напредок и истакна дека нема место за импровизации или грешки, бидејќи целта е да се достигнат земјите од регионот и потоа развиените европски држави.
ИЗВОР: ТВ 21
