Премиерот Мицкоски остави широко отворена врата за приклучувањето на ЛДП на владината коалиција, откако претседателката на партијата Моника Зајкова ја напушти опозициската коалиција предводена од СДСМ. Вели дека се уште немале разговори но дека секој е добредојден кој ги застапува интересите на Владата, но и дека за тоа ќе бидат консултирани коалициските партнери.
„Секој кој што ги споделува и поддржува политиките на оваа Влада може да се приклучи и да ги подржува овие политики. Дали официјално би биле дел од владината коалиција се уште не сум разговарал ниту во рамките на коалицијата, ниту пак во рамките на партијата. Сепак тоа е процес кој што е потребно да добие поддршка од сите чинители. Не е доволно Христијан Мицкоски што ќе каже, битно е да видиме што велат коалиционите партнери. Но секоја поддршка од секој пратеник кој што ги поддржува политиките на оваа Влада е добредојдена во рамките на гласањето во Парламентот“, вели Христијан Мицкоски.
Но, токму поддршките на политиките на премиерот Мицкоски околу одложеното дејство на уставните измени што отворено ги искажа во Дејли клик на ТВ21 оценувајќи дека тоа е добра можност за откочување на евроинтеграциите, ја отвори дилемата дали Зајкова се приближува кон власта. Сепак таа, во изјава за порталот Рацин вели дека останува да делува независно.
„Како пратеник останувам да делувам независно во Собранието. ЛДП е независен политички субјект, со своја политичка програма и со своја либерална идеологија. Пракса е на партијата да има свој став околу прашањата кои понекогаш и порано бил различен од ставот на коалициските партнери, како на пример рамниот данок за кој ЛДП беше застапник додека СДСМ инсистираше на прогресивен данок“, вели Моника Зајкова.
ЛДП на последните избори настапи во коалицијата предводена од СДСМ, а Зајкова беше коносител на листа во втората изборна единица заедно со екс претседателот на СДСМ Димитар Ковачевски. ТВ21 повикувајќи се на партиски извори пренесе дека Зајкова излегува од коалицијата со СДСМ, но не се знае дали ќе и се приклучи на владејачката коалиција предводена од ВМРО-ДПМНЕ.
ИЗВОР: ТВ 21
