Eвропската унија беше и останува наша цел како и на генерациите што доаѓаат, но единствено Македонија е земја за која не важат критериумите за членство во Унијата како и за другите земји кои станале или се во процес да станат членки.
Ова го истакна премиерот Христијан Мицкоски на Самитот „Македонија 2025“, кој рече дека претходно биле правени грешки со тоа што се прифаќале услови, се правеле отстапки, но според него потребен е друг пристап за Македонија да стане привлечна за влез во ЕУ.
„Тоа значи дека треба да бидете 2 – 3 пати подобри од сите други ако сакате да звучите логично и ако сакате другите да ве разберат. И треба да научите да победувате и во Вашингтон и во Брисел и во Берлин и во Париз и во Рим и во останатите светски мегалополиси и центри ако сакате да бидете разбрани со поинаков тон и поинаква порака да испратите од онаа која што ја слушале години наназад“, вели Христијан Мицкоски.
Како една од предностите на нашата земја тој ги гледа во изградбата на коридорите и фактот што сме стратешка раскрсница на Балканот.
„Единствената наша стратешка предност како земја која што не излегува на море е тоа што ние сме природна раскрсница на неколку паневропски коридори меѓу кои што се коридорите 8 и 10, но и покрај нас, паралелно поминува и коридорот 11 што би биле единствена земја во Европа која што директно ќе има комуникација со овие три важни коридори. И јас тука ја гледам иднината и само на тој начин ние можеме да влеземе во оптиката на големите светски сили и тука треба да го темелиме нашиот развој“, вели Христијан Мицкоски.
Во рамките на зајакнувањето на соработката на земјава со Европската унија, во четврток пристигнува претседателот на Европскиот совет Антонио Кошта кој практично ќе биде во посета на земјите од Западен Балкан.
ИЗВОР: ТВ 21
