Митовски: Водата во Крива река е сериозно загадена и претставува опасност за животот и здравјето на луѓето

Градоначалникот на Крива Паланка Сашко Митовски рече дека ќе бара кривична одговорност од одговорните и дека водата на Крива река во Крива Паланка е опасно загадена по хаваријата во рдуникот „Тораница“, а во неа истекле тешки метали и цијанид.

Тој откри дека во водата има десет пати поголема концентрација на олово и стотици пати повеќе цијанид, азот и фосфор.

– Согласно извештајот од акредитирана лабораторија „Технолаб“ од Скопје, водата во Крива река, по земените примероци еден ден по настанувањето на хаваријата во рудникот „Тораница“ е сериозно загадена и претставува опасност за животот и здравјето на луѓето. Извештајот по направеното тестирање на квалитетот на водата во Крива Река покажува неверојатно зголемени концентрации на штетни материи, а она што најмногу загрижува е десеткратното присуство и концентрација на тешки метали, поточно количината на олово присутно во водата – рече Митовски на прес-конференција.