МОСКВА (АА) – Венецуела ги осудува геноцидот и истребувањето на палестинскиот народ што ги врши Израел, изјави денес министерот за надворешни работи Иван Гил, јавува Анадолу.
„Единственото решение за конфликтот е во создавањето палестинска држава поддржана од Советот за безбедност на ОН“, изјави Гил на прес-конференцијата во Москва по средбата со рускиот колега Сергеј Лавров.
„Веќе побаравме итен прекин на огнот за да преминеме на преговори. Гледаме дека Израел врши истребување на палестинскиот народ. Тоа е неподносливо. И меѓународната заедница нема да го толерира тоа“, нагласи тој.
Гил ги поддржа договорите постигнати на неодамнешниот заеднички самит на Арапската лига и Организацијата за исламска соработка и ја повика меѓународната заедница „да ги мобилизира своите сили за поддршка на палестинскиот народ“.
Венецуелскиот претставник рече дека Израел секој ден ги крши човековите права и меѓународното законодавство преку бомбардирање, напади врз болници и друга цивилна инфраструктура.
„Тука не може да има прашања. Оваа политика треба веднаш да се прекине. Неопходно е да се истражат и да се осудат сторителите на воените злосторства, а населението од Појасот Газа и Палестина треба да имаат право да го искористат своето право на независност и да ги добијат своите територии“, додаде тој.
