Миграцијата ја зголемува потребата за негуватели – во Кичево Црвениот крст со 25 негуватели помага на 77 стари лица

Една од најбараните услуги од граѓаните до Црвениот крст е грижата за постарите лица кои живеат сами и се во потешка здравствена состојба.

Оваа услуга започна да се пружа во 2022 година, а со текот на годините побарувачката за значително расте.

„Досега успешно се спроведува како социјална услуга, помош за грижа и помош во домот, а корисници се постарите лица од општина Кичево заедно со селата. Ги покриваме со нашите 25 негуватели кои моментално работат и им помагаат на 77 постари лица кои имаат потреба од помош и грижа во домот. Претежно живеат сами и се во потешка здравствена состојба и имаат потреба од грижа.“, порача Ивана Лазеска.

Бројот на побарувања за овој вид грижа значително се зголеми, земајќи го предвид и фактот дека миграцијата  испразни многу домови каде останаа само постарите членови на семејствата.

„Од година во година или од месец во месец расте бројот на заинтересирани граѓани, бидејќи, за жал, статистиките покажуваат дека младите заминуваат, а потребата за грижа за постарите лица станува сè поголема и се зголемува бројот на лица кои очекуваат да им се помогне од наша страна.“, вели Ивана Лазеска.

Црвениот крст во Кичево за време на летото организирал низа активности, а само во првата половина од годинава, во акцијата за дарување крв, собрале 574 единици крв.