Аргентинската фудбалска ѕвезда, 38-годишниот Лионел Меси, изјави дека се надева оти ќе игра на Светското првенство во 2026 година, но дека конечната одлука ќе ја донесе дури кога ќе биде сигурен дека е физички подготвен сто проценти и дека со својата игра може да му помогне на тимот во одбраната на титулата светски шампион.
„Посебно е чувството да се игра на Светско првенство. Би сакал да играм и следната година ако бидам подготвен и ако можам да имам улога што ќе ѝ помогне на репрезентацијата. Кога следната година ќе започне предсезоната со Интер Мајами, тогаш секојдневно ќе проценувам дали можам да бидам на 100% и дали ќе бидам од корист за тимот“, изјави Меси во интервју за NBC News.
Оваа сезона, Меси беше најдобар стрелец во американската МЛС лига со 29 голови и 16 асистенции. Во Интер Мајами пристигна во летото 2023 година, а неодамна го продолжи договорот со клубот до крајот на 2028 година.
„Желбата да играм на Светското првенство е огромна. Би сакал повторно да бидам на теренот и да го бранам трофејот што го освоивме во Катар 2022. Играте за својата репрезентација – тоа е исполнување на сонот. Имав среќа да освојам сè со Барселона, индивидуално и тимски, но вистина е дека долго време ми недостасуваше голем успех со Аргентина. Освојувањето на Светското првенство беше мојот животен сон. Ако го прашате кој било фудбалер, ќе ви каже истото – дека сонот му е да стане светски шампион,“ рече Меси.
Меси осум пати бил прогласуван за најдобар фудбалер во светот. Со Барселона десет пати бил шампион на Шпанија и освоил четири трофеи во Лигата на шампионите. Пред да дојде во САД, двапати беше шампион на Франција со ПСЖ, но првиот трофеј со Аргентина го освои во 2021 година на Копа Америка. Само една година подоцна, ја заокружи својата кариера со највисокото можено достигнување – титулата светски првак.
Извор: vecer.mk
