Директорот на Клиниката за физикална медицина и рехабилитација Злате Мехмедовиќ, во „Дејли Клик“ на ТВ21 на прашањето дали е потребен нов Клинички центар на Македонија, рече дека тоа не е потребно, со оглед на тоа како се развива иднината на медицината.
„Немаме потреба од нов клинички центар, затоа што до 2050 година ќе се смени начинот на давање на услугите за здравствена заштита. Имавме студија да видиме какви ќе бидат болниците во иднината, и видовме дека тоа ќе бидат таканаречени „болници без ѕидови“. Знаеме колку тешко се гради Клинички центар, ќе излезе во период додека го изградиме новиот центар, ќе немаме потреба од него. ТВ медицината е во експанзија, веројатноста е дека преку сензори и преку некои меидицински апарати, ќе може да ги испратите информации до вашиот лекар, и тој да ви врати со соодветна терапија. Болници без ѕидови се веројатно новите клинички центри. И тоа не оди на штета на пациентот. Носите паметен часовник, може во моментот да ви измери пулс, во блиска иднина и ЕКГ, и податоците да му ги испратите на лекар, и тој да ви врати што треба да правите. Не се чудете ако ви стигне порака од вашиот лекар, затоа што вашиот часовник ќе мери параметри и самиот ќе му испрати порака на вашиот матичен лекар за вашата здравствена состојба, и вие ќе добиете се што треба да правите“, изјави Мехмедовиќ.
Тој кажа дека целта на секоја земја во светот е да создава здрава нација, наместо да лекува болести.
„Ниту една земја на светот не сака да лекува болести, туку да создава здрава нација“, рече Мехмедовиќ.
ИЗВОР: ТВ 21
