Првиот заменик-претседател на Владата и лидер на коалицијата ВЛЕН, Изет Меџити, ја обвини градоначалничката на Град Скопје, Данела Арсовска, дека спроведува намерна националистичка и антиалбанска кампања. Во интервју со новинарот Александар Видиновски на Канал 5, Меџити истакна дека последните постапки на Арсовска имаат за цел стигматизација на Албанците и се спроведуваат со помош на пратеникот на ДУИ, Блерим Беџети.
„Ја потсетувам градоначалничката Арсовска дека нејзините еднострани настапи само во Чаир и прикажувањето на бесправната градба само во овој дел од градот оставаат голем простор за сомнежи околу нејзините намери,“ изјави Меџити.
Тој додаде дека Чаир е само шеста општина по бројот на бесправни градби во Скопје и дека, доколку навистина загриженоста на Арсовска беше искрена, таа ќе преземеше активности и во другите проблематични општини, како Сарај, каде според Меџити, контролата ја има токму нејзиниот политички партнер, Блерим Беџети.
