Масовниот убиец од Прага во прошталното писмо признал дека претходно убил маж и двомесечно бебе

Во писмото за кое објави полицијата, студентот признал дека претходно убил 32-годишен маж и неговото двомесечно бебе во шумата на периферијата на Прага. Убиството на мажот и бебето се случило една недела пред масовното убиство на универзитетот, на 15 декември

Чешката полиција објави дека пронашла прошатално писмо од Давид Козак, студентот кој на 21 декември со пушка уби 14 луѓе на Карловиот универзитет во Прага, рани уште 25 лица, по што изврши самоубиство. Во писмото за кое објави полицијата, студентот признал дека претходно убил 32-годишен маж и неговото двомесечно бебе во шумата на периферијата на Прага.

„Во текот на истрагата, при претресот на неговата куќа е пронајдено проштално писмо. Писмото го напишал пред да го изврши пукањето и во него признал дека го извршил убиството во шумата Клановице“,

рече портпаролот на чешката полиција, Јан Дањек.

Деталите за ова убиство засега не се соопштени, но балистичките тестови утврдиле дека оружјето користено во шумата Клановице е истото кое било пронајдено во куќата на убиецот. Убиството на мажот и неговото двомесечно бебе се случило една недела пред масовното убиство на универзитетот, на 15 декември.

• Чешката полиција истражува дали денешниот напаѓач на Карловиот универзитет пред една недела убил татко и бебе

Пред да го изврши убиството на Карловиот универзитет, 24-годишниот студент претходно истиот ден го убил својот татко во селото Хостоун, 20 километри западно од Прага, а потоа отишол во центарот на градот.