Поранешниот вицепремиер за европски прашања, Бојан Маричиќ, во емисијата „Само интервју“ на Канал 5 телевизија упати критика до новата Влада, повикувајќи на искреност и јасна позиција околу процесот на европските интеграции и односот со Бугарија. Тој порача дека обидите за ревидирање на преговарачката рамка се нереални и дека е време тоа јасно да се соопшти на јавноста.
„Јас сум растеретен од било каква политичка функција, но како граѓанин заинтересиран за ЕУ, сакам да видам каде Владата сака да ја одведе Македонија. На почетокот се зборуваше дека ќе ја смениме преговарачката рамка, потоа дека ќе чекаме нова бугарска Влада, па писма до ЕУ, па Стразбур, па одложено дејство… и на крај, приказната не успеа,“ рече Маричиќ.
Тој истакна дека досега се направени неколку нереални чекори за промена на европската позиција на Македонија, но по една година неуспешни обиди, потребно е да се признае дека таквата промена е речиси невозможна.
„Многу е поважно сега да се слушне еден искрен одговор, дека нема лесна можност да се смени преговарачката рамка. Тоа е речиси невозможно. Треба да престанеме со илузии,“ потенцираше тој.
Маричиќ предупреди и на опасноста од повторно враќање на прашањата за јазикот и идентитетот на преговарачката маса, што би значело повторно предавање на контролата во рацете на Бугарија.
„Што е доволна гаранција дека нема да има нови барања? Повторно сакаме да го ставиме клучот во рацете на Бугарија, да нè прашуваат дали сме Македонци? Прашањата за идентитетот и јазикот мора да бидат надвор од масата,“ рече тој.
Тој потсети дека уште во 2022 година, пратеничката група на СДСМ предложила заклучоци кои беа усвоени во Парламентот, според кои овие теми не смеат да се отвораат. Доколку тоа се случи, смета Маричиќ, преговорите со ЕУ треба веднаш да се прекинат.
На крајот, тој заклучи дека најголемиот дел од работата во текот на преговорите зависи од самата држава:
„Нема гаранции ниту од Холандија, ниту од Шведска. Но, од нас се очекува да ги имплементираме реформите. И тука лежи клучот – во нашата волја и капацитет,“ заврши Маричиќ.
ИЗВОР: racin.mk
