ВМРО-ДПМНЕ денеска обвини дека СДС го блокира донесувањето на Изборниот законик поради, како што велат од партијата, страв од изборен пораз и од губење на поддршката од македонската дијаспора.
На прес-конференција, портпаролот на ВМРО-ДПМНЕ, Валентин Манасиевски, оцени дека, според партијата, политиките на поранешната власт предводена од СДС довеле до иселување на голем број граѓани, а сега, како што рече, со повеќе од 10.000 амандмани се блокираат измените на Изборниот законик.
Според Манасиевски, вистинската причина за блокадата е стравот од уште поголем пораз на следните избори, додавајќи дека СДС нема политичка визија и дека со своите постапки им штети на државата и на граѓаните.
Од ВМРО-ДПМНЕ посочија и дека измените на Изборниот законик добиле позитивни оценки од амбасадорот на Европската Унија во Македонија, Михалис Рокас, кој, според партијата, истакнал дека законот е дел од исполнувањето на обврските од Реформската агенда и повикал на консензус меѓу политичките партии за негово донесување.
Во соопштението, ВМРО-ДПМНЕ оценува дека граѓаните ги препознале, како што наведуваат, намерите на СДС и дека тоа ќе се одрази на резултатите од следниот изборен циклус.
Извор: zurnal.mk
