Макрон: Следната недела во Париз ќе се одржи нов самит за Украина

ИСТАНБУЛ (АА) – Францускиот претседател Емануел Макрон објави дека следната недела во Париз ќе се одржи нов самит за Украина, јавува Анадолу.

„Следниот четврток ќе одржиме самит на ‘коалицијата на подготвените’ во Париз, во присуство на претседателот Зеленски. Ќе ја финализираме нашата работа за краткорочната поддршка на украинската армија“, изјави Макрон по првиот ден од самитот на Европскиот совет во Брисел.

Тој повтори дека фокусот останува на стратегијата за одбрана на Украина и безбедносните гаранции во Европа, нагласувајќи дека само кога Русија и Украина ќе се обврзат на траен прекин на огнот, ќе може да се дискутира за гаранции за безбедност.

„Легитимно е Украина, како суверена држава, да одреди што ѝ е потребно за да ја осигури својата безбедност. Ќе постапуваме на организиран начин и нема да прифатиме преголеми барања или провокации“, истакна Макрон.

Тој додаде дека Европа ја спроведува својата стратегија за повторно вооружување.

„Сега имаме стратегија за целосно повторно вооружување на Европа, односно да се опремиме и целосно да ја вратиме нашата независност во следните пет години. Мора да се вооружиме, да станеме поавтономни, да ги заштитиме нашите граници и да го обезбедиме соседството“, рече францускиот претседател.

Макрон, исто така, најави дека на самитот се дискутирало и за подготовката на следниот буџет за справување со предизвиците во одбраната, вештачката интелигенција, технологијата и климатските промени.

„Се наоѓаме на крајот од еден период во кој имавме корист од ‘дивидендата на мирот’, кога можевме да си дозволиме да ги занемариме инвестициите во одбраната, верувајќи дека трговијата ќе ги реши глобалните конфликти“, нагласи Макрон, додавајќи дека секоја сигурност на која се потпирала Европа е разнишана.

„Европа е фундаментално оспорена“, заклучи тој.

Францускиот претседател објави и дека ќе отпатува во Египет на 7 и 8 април и дека наредните денови ќе го прими либанскиот претседател Жозеф Аун во Париз.

Макрон додаде дека на самитот се разговарало и за Сирија, истакнувајќи ја потребата за враќање на стабилноста и борбата против тероризмот. Тој најави дека следните денови ќе стапи во контакт со сирискиот претседател Ахмед ал-Шара за натамошни разговори.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.