Макрон го повика Израел да избегне конфликт со Либан

Францускиот претседател изразил загриженост за бројот на цивилни жртви и хуманитарната вонредна состојба во Газа

Францускиот претседател Емануел Макрон го повика членот на израелскиот воен кабинет Бени Ганц да избегне ескалација на состојбата во Либан, се вели во соопштението на француското претседателство, пренесува Си-ен-ен.

Коментарите на Макрон доаѓаат откако вчера Хамас го обвини Израел дека извршил напад во Бејрут во кој беше убиен високиот лидер на Хамас, Салех Ал-Арури.

Израел официјално не ја презема одговорност за овој настан.

Макрон, исто така, изразил загриженост за бројот на цивилни жртви и хуманитарната вонредна состојба во Газа.

„Од суштинско значење е да се избегне ситуација која може да ескалира, особено во Либан. Франција ќе продолжи да ги пренесува овие пораки до сите оние директно или индиректно вклучени во овие напади“,

се вели во изјавата на францускиот претседател Макрон.

Според Министерството за здравство управувано од Хамас, во израелските напади врз Газа загинале најмалку 22 185 Палестинци.

Францускиот претседател се изјасни против изјави кои повикуваат на принудно раселување на жителите на Газа, за кои посочи дека се неприфатливи.

Во експлозија во Бејрут е убиен еден од водачите на Хамас

Двајца членови на десничарската коалиција на премиерот Бенјамин Нетанјаху во последните денови изразија ставови дека палестинските жители треба да ја напуштат Газа додека властите ја разгледуваат повоената иднина на крајбрежната енклава.

За Хезболах нападот во Бејрут нема да помине без казна, Израел подготвен на највисока борбена готовност