„Нашата цел не е да бидеме вазали на двете хегемонистички сили. Не сакаме да зависиме од доминацијата на, да речеме, Кина, ниту да бидеме премногу изложени на непредвидливоста на САД“, им рече Макрон на студентите во Сеул, за време на турнејата низ Азија, каде што разговараше за поморската безбедност во Ормуската Теснина и поблиската соработка со Јужна Кореја и Јапонија, пренесе Блумберг.
Според него, европските земји имаат заедничка агенда со земји како Јапонија и Јужна Кореја за прашањата како што се меѓународното право, демократијата, климатските промени и глобалното здравје.
Тој ги истакна другите слично поврзани земји: Австралија, Бразил, Канада и Индија.
„Заедно, оваа коалиција може да работи на вештачка интелигенција, вселена, енергија, нуклеарна енергија, одбрана, безбедност – што и да е“, истакна францускиот претседател.
Макрон претходно повика Европа да биде противтежа на САД и Кина, а за време на патувањето во Кина во 2023 година, тој предизвика негодување кај сојузниците на САД во Азија и Европа кога рече дека ЕУ не треба да биде „вазал“ на САД.
Во текот на изминатите неколку години, следејќи ја традицијата воспоставена од францускиот лидер од Втората светска војна, Шарл де Гол, Макрон постојано се обидуваше да најде среден пат меѓу Кина и САД, предупредувајќи на расцеп во глобалниот поредок, наведува оваа американска агенција.
Апелите на Макрон доаѓаат во време кога американскиот претседател Доналд Трамп, исто така, ги обнови своите напади врз НАТО и другите сојузници, особено критикувајќи ги Франција и Јужна Кореја дека не му помагаат доволно во Иран.
Извор: vecer.mk
