Македонската фудбалска репрезентација до 21 година пристигна во Анталија и денеска ќе ги започне подготовките за претстојните три контролни натпревари во турскиот туристички центар.
Еден од најдобрите поединци на штипска Брегалница и стандарден член на репрезентацијата, Иван Николов даде свое видување за претстојните натпревари што не очекуваат и квалификацискиот циклус за пласман на ЕП 2024.
-Контролните мечеви во Анталија се одлична можност за што подобро да се подготвиме за предизвикот што не очекува во септември, односно почетокот на квалификациите за пласман на Европско првенство. Што се однесува до самата група од квалификациите, јасно е дека во денешно време нема лесно противници, но оваа наша група на фудбалери поседува голем квалитет и заедништво, имаме големи очекувања, сакаме да оствариме нешто големо и да избориме пласман на Европско првенство. Имаме серија на позитивни резултати на последните натпревари, што ни дава дополнителен мотив дека можеме да одиграме добри квалификации. Првиот меч во Анталија го играме против Летонија, селекција со високи и снажни фудбалери која игра доста тврд фудбал. Ние сме поквалитетна селекција од нив, но тоа ќе мора да го покажеме на терен. Атмосферата во самиот тим е одлична, се познаваме меѓусебно многу добро, со оглед на тоа што поголемиот дел од фудбалерите бевме дел и од репрезентацијата на Македонија до 19 години Убеден сум дека со голема пожртвуваност, борба и желба за надигрување можеме да оствариме добри резултати.
Македонските фудбалери во рамките на Анталија куп ќе се сретнат со Летонија (23 март), Финска (25 март) и Словачка (28 март).
ИЗВОР: kurir.mk
