МВР поднесе кривична пријава против македонски државјанин, Ј.К., за „Учество во странска војска, полиција, паравоени или параполициски формации“.
Според информациите, Ј.К. се поврзал преку интернет со лице кое се претставило како регрут за руската војска. Преку оваа комуникација, тој изразил подготвеност да се приклучи на новоформиран одред во руската армија, наменет за борби во Украина, за месечна плата од 3000 евра.
На 5 октомври 2024 година, тој отпатувал од Скопје преку Белград до Москва. По пристигнувањето, престојувал една недела со три други странски државјани, чекајќи да ги заврши административните и медицинските процедури за приклучување кон руската војска.
На 11 октомври, при неговото враќање во Скопје, македонските власти го привеле и спровеле разговор. Подоцна, на 29 ноември, по судски налог, е извршен претрес во неговиот дом, по што му е одредена мерка куќен притвор во траење од 30 дена.
Иако официјална потврда дека македонски државјани се борат на руско-украинските фронтови нема, според податоци на руското Министерство за надворешни работи, објавени во март, 90 Македонци се пријавиле да се борат на украинска страна, од кои 30 наводно загинале.
Кривичниот законик на Северна Македонија предвидува затворски казни од најмалку четири до пет години за учество, регрутација или поттикнување за борби во странски формации. Овие одредби важат и за лица кои би се приклучиле на конфликтот во Украина.
ИЗВОР: racin.mk
