СДСМ остро реагира и се противи на најавите на градоначалникот на Тетово, Билал Касами, за преименување на улиците во градот кои носат имиња од нашето антифашистичкото минато.
„На вредностите од НОБ и антифашизмот почива современата македонска држава. Било какво бришење на најсветлите страници на македонската историја значат удар врз темелот на којшто почива државата. Значењето на партизанската борба и нејзините идеалите никој не смее да ја омаловажува, брише и пребришува“ рече Андријана Томовска, членка на Извршниот одбор на СДСМ.
Таа додаде дека нејзината партија како наследник и поддржувач на НОБ и антифашизмот се противстави на овие најави на Касами.
„Советниците на СДСМ ќе застанат силно против преименувањето на улиците. Како коалициски партнер на Касами, бараме Мицкоски јавно да го повика да се повлече од овој предлог. А советниците на ДПМНЕ исто така да се спротивстават и да застанат против, со што оваа одлука нема да се донесе“ рече Томовска.
Таа кажа дека СДСМ јавно ги осудува намерите на Касами да создаде нови поделби, раздор меѓу граѓаните и етнички тензии.
„Националистичките сценарија на Касами се на штета на сите граѓани без разлика на етничка или партиска припадност“ рече Томовска.
ИЗВОР: racin.mk
