Против селекцијата на Унгарија, македонската ракометна репрезентација го започнува своето деветто Светско ракометно првенство.
Избраниците на селекторот Кире Лазаров најавуваат дека се подготвени за дуелот против фаворитот Унгарија, откако синоќа го одржаа својот последен тренинг пред почетокот на првенството.
Македонската репрезентација своите натрпевари во прелиминарната фаза ги игра во Вараждин, а натпреварот со Унгарија започнува вечерва во 20:30 часот.
Голем број на македонски навивачи се упатија во Хрватска за да ја бодрат Македонија да го изненади силниот ривал и да имаат успешно Светско првенство.
Светското ракометно првенство 2025 година се одржува во Хрватска, Данска и Норвешка, а ќе настапат вкупно 32 земји. Репрезентациите се поделени во осум групи со по четири екипи, а Македонија покрај со Унгарија е во група и со Холандија и Гвинеја.
За пласман во главната рунда од натрпеварувањето, македонските ракометари треба да завршат на едно од првите три места во групата.
Во второто коло Македонија ќе игра против Холандија на 17 јануари, додека последниот натпревар од прелиминарната рунда ќе биде натпреварот со Гвинеја на 19 јануари.
ИЗВОР: racin.mk
