АНКАРА (АА) – Меѓународната агенција за атомска енергија (МААЕ) денес потврди дека „не постои непосреден ризик за безбедноста“ на нуклеарната централа Запорожје по оштетувањето на украинската брана „Каховка“, јавува Анадолу.
Во соопштението на Агенцијата објавено на Твитер се вели: „МААЕ е свесна за извештаите за причинетата штета на украинската брана ‘Каховка’; експерти на МААЕ во нуклеарната централа Запорожје внимателно ја следат ситуацијата; не постои директен ризик за нуклеарната безбедност во централата“.
Експлозиите во хидроелектраната „Каховка“ во близина на Керсон, на југот на Украина, денес предизвикаа поплави, а Москва и Киев меѓусебно се обвинуваат за уништување на браната.
Украинскиот претседател Владимир Зеленски на Твитер напиша дека уништувањето на браната „потврдува пред целиот свет дека тие (руските сили) мора да бидат протерани од секој агол на украинската територија“.
„Сите служби работат. Го свикав Советот за национална безбедност и одбрана“, рече тој.
Од друга страна, челникот на градот Нова Каховка, на источниот брег на реката Днепар, кој е под руска контрола, преку Телеграм рече дека нападите во текот на ноќта на украинските вооружени сили довеле до уништување на вентилите, а со тоа и за неконтролирано ослободување на водата низводно.
Извор: www.aa.com.tr
