Министерот за култура и туризам, Зоран Љутков, при денешната средба со новинарите ја претстави состојбата што ја затекнал при преземањето на функцијата и напредокот што Министерството го постигнало во изминатата година. Како главни предизвици ги посочи нефункционалните капитални проекти, институциите со ограничени ресурси и сложената административна структура.
– Затекнавме многу проекти што со години тапкаат во место, без јасна динамика или визија. Затоа, веднаш се фокусиравме на ревизија и рестарт на тие процеси – изјави Љутков.
Во таа насока, Министерството веќе спроведува реформа на културната политика со цел да биде поинклузивна, потранспарентна и насочена кон реалните потреби на културните работници и публиката.
Повеќе пари за институциите и плати од буџетот
Со ребалансот на буџетот, на Министерството му се одобрени дополнителни 267.811.000 денари за исплата на плати во националните и локалните установи, како и за државни награди, национални пензии и поддршка на уметници. Љутков потенцираше дека е надминат долгогодишниот проблем (2019–2024) кога платите мораа да се покриваат од програмските средства, со што сега културните институции добиваат значително повеќе средства за реализација на проекти и програми.
Згаснува Агенцијата за туризам – вработените преминуваат во Министерството
Како дел од административните реформи, Љутков најави згаснување на Агенцијата за поддршка на туризмот, а нејзините 30-ина вработени ќе бидат интегрирани во Министерството за култура и туризам. За таа цел веќе е изработена нова систематизација.
Со трансферот на агенцијата, Министерството добива дополнителни 605 милиони денари (околу 10 милиони евра), кои ќе се искористат за проекти поврзани со културата и туризмот: уредување на локалитетот Плаошник, реконструкција на Скопското кале, поддршка на Турскиот театар-Скопје, Агенцијата за филм, откуп на ликовни дела и развој на креативните индустрии.
Инспекторат за македонски јазик
Министерот најави и формирање на Инспекторат за македонски јазик. Наскоро ќе биде распишан оглас за вработување 12 инспектори, чии задачи ќе бидат следење и спроведување на Законот за употреба на македонскиот јазик.
– Со сите овие чекори поставуваме темели за поефикасно, правично и развојно културно и туристичко опкружување – заклучи Љутков.
ИЗВОР: ТВ 21
