Фудбалерите на Баерн Минхен комплетно ја оправдаа фаворитската улога и славеа со убедливи и огромни 9-2 (3-0) над Динамо Загреб во првото коло од Лигата на шампионите.
Кејн, Гереро и Олисе стрелаа во првото полувреме, но Динамо покажа дека поседува квалитет и за момент се врати во игра во второто полувреме.
Модрите“ од Загреб приредија шеесетсекунден блицкриг и успеаја двапати да ја затресат мрежата на Баварците, а головите ги постигнаа Петковиќ и Огивара во 49. и 50. минута. Се чинеше дека Хрватите добија мотивација плус за остатокот од мечот, но Баерн повторно го покажа својот квалитет и бргу ги врати нештата во своја полза.
Најпрво Хари Кејн во 58. минута донесе двојна предност (4-2), а потоа и Мајкл Олисе вторпат се запиша во листата на стрелците само три минути подоцна. Динамо се обиде уште еднаш да го ублажи ударот и создаде уште две добри шанси, но Баварците продолжија со торпедирањето и по шести пат го совладаа голманот Невистиќ.
Кејн прецизно реализираше пенал во 73. минута и оствари хет-трик во првиот елитен меч сезонава, а до крајот Баерн не запре со налетот и до максимум ја наполни гостинската мрежа. Англискиот капитен постигна четврти погодок (исто така од пенал) во 78. минута, а Лирој Сане зголеми на 8-2 само шест минути подоцна. Вистинскиот потоп на Динамо и конечните 9-2 ги потврди Леон Горецка со погодокот во втората минута од судиското надополнување.
Реал Мадрид имаше големи проблеми против екипата на Штудгарт, но на крајот сепак успеа да извојува победа со конечни 3-1 (0-0).
„Кралевите“ имаа одлични шанси во првиот дел, но и Германците не беа за потценување и дури четири пати се заканија по голот на Куртоа. До истекот на првите 45 минути немаше голови, а вистинските возбудувања пристигнаа во вториот дел.
Најпрво Реал поведе преку Килијан Мбапе само една минута по стартот, но Штутгарт делуваше како сериозен ривал и постојано се закануваше по страничните позиции. Германскиот тим продираше и по средината, па наградата за овој пристап пристигна во 68. минута, кога Дениз Ундав начека една топка и ја смести во празната мрежа на Реал. Спасител беше Рудигер кој го донесе победничкиот гол за европскиот шампион.
До крајот на мечот Штутгарт се обиде уште еднаш да се врати во игра и да приреди ново изненадување на „Сантиаго Бернабеу“, но Реал во самиот финиш го искористи празниот простор и го комплетираше мечот со нов погодок. Бразилецот Ендрик ги постави конечните 3-1 во 95. минута и ја потврди победата за кралскиот клуб.
Извор: kurir.mk
