ИСТАНБУЛ (АА) – Кинескиот премиер Ли Кианг ќе присуствува на Самитот на Г-20 во Индија оваа недела на местото на претседателот Си Џинпинг, потврдено е денес, пренесува Анадолу.
„На повик на Владата на Република Индија, премиерот на Државниот совет, Ли Кианг, ќе присуствува на 18. Самит на Г-20 што ќе се одржи во Њу Делхи, Индија, на 9 и 10 септември“, се вели во соопштението на кинеското Министерство за надворешни работи.
Индија е домаќин на состанокот на кој се очекува да учествуваат многумина светски лидери, меѓу кои и американскиот претседател Џо Бајден, а доаѓањето на рускиот претседател Владимир Путин не е планирано.
Од вторник Ли ќе присуствува на годишниот Самит на Асоцијацијата на земјите од Југоисточна Азија (АСЕАН) во Индонезија, а се очекува во петок да лета од Џакарта до Њу Делхи.
Кина соопшти дека „се радува“ на Самитот на кој ќе се постигне „консензус за решавање на предизвиците во економијата и развојот, пренесување доверба на надворешниот свет и промовирање заеднички просперитет и раст“, соопшти Министерството, според државниот „Глобал тајмс“.
