На средбите го повторивме она што и ЕУ и САД го побараа од партиите да го направат кога повикаа на политичко решение: итна деескалација, предвремени избори со учество на косовските Срби и враќање на дијалогот за нормализација, пишува Лајчак
Специјалниот претставник на Европската унија (ЕУ) за дијалогот меѓу Србија и Косово, Мирослав Лајчак, на Фејсбук објави дека се надевал на подобар резултат од минатонеделната мисија на Косово со заменик-помошникот државен секретар на САД и специјален пратеник за Западен Балкан, Габриел Ескобар.
Лајчак вели дека патувал со Ескобар во Приштина и Белград со цел да се справи со тензичната ситуација на северот на Косово и да го истражи потенцијалот за политичко решение.
„Во Косово се сретнавме со највисокото раководство, вклучително и претседателката Вјоса Османи, премиерот Албин Курти и првиот вицепремиер Бесник Бислими со кои имавме долга дискусија“,
рече тој.
Лајчак вели дека на средбите била пренесена загриженоста за ситуацијата на северот на Косово и била нагласена потребата од итна деескалација.
„Го повторивме она што и ЕУ и САД побараа од партиите да го направат кога повикаа на политичко решение: итна деескалација, предвремени избори со учество на косовските Срби и враќање на дијалогот за нормализација“,
нагласи Лајчак.
Лајчак објави дека разговарал и со опозициските водачи на косовските Албанци, објаснувајќи ги последиците од актуелната криза и штетата што таа ја предизвикува на меѓународниот углед на Косово.
„Побаравме од нив поддршка за политичко решение за смирување на тензиите. Бидејќи ниедно решение не може да се постигне без вклучување на засегнатото население, јас и Ескобар се сретнавме и со претставници на Српската листа и граѓанското општество, со цел да ги слушнеме и да објасниме зошто е важно косовските Срби да учествуваат на новите избори“,
нагласува Лајчак во објавата.
Лајчак вели дека тој и Ескобар имале „подеднакво долги, но воопшто не лесни разговори со претседателот Александар Вучиќ“.
„Му објаснивме како треба да придонесе за излез од актуелната криза и се осврнавме на сложената ситуација на Србите во Косово. Посебно нагласивме дека, иако сите граѓани имаат право на мирен протест, насилството никогаш не е прифатливо и не може да има неказнивост“,
вели Лајчак.
Според него, заедно со Ескобар се надевале на повисок резултат од мисијата, но за жал, како што пишува Лајчак, и покрај некои позитивни сигнали, тензиите продолжуваат да растат.
„По кратка посета на Годишниот состанок на Европскиот совет за надворешни односи во Стокхолм, каде што имав можност да разговарам со голем број луѓе од Европа и САД, сега сум повторно во Брисел за да ги информирам ЕУ и земјите-членки за моите наоди и следни чекори“,
додава тој.
Извор: 360stepeni.mk
