Лабораториското тестирање покажа дека супстанцата пронајдена во Белата куќа е кокаин

Лице запознаето со случајот соопшти дека супстанцата е пронајдена на приземјето на западното крило на Белата куќа. Ова место го поминуваат голем број на луѓе, особено за време на викендите, кога се организираат тури низ Белата куќа, а посетителите, заедно со персоналот, имаат можност да направат обиколка на комплексот. Кокаинот е пронајден во близина на местото каде што посетителите ги оставаат своите мобилни телефони

Лабораториското тестирање на примерокот од белата прашкаста материја, која во неделата беше пронајдена во Белата куќа, покажа дека се работи за кокаин, изјави портпаролот на Тајната служба за Си-ен-ен.

Прелиминарните теренски тестирања покажаа дека се работи за кокаин, но примерот од супстанцата беше испратен на понатамошно испитување за да се утврди за каква точно материја се работи. 

• „Вашингтон пост“: Тајната служба пронашла кокаин во Белата куќа

Лице запознаето со случајот, кое го цитира Си-ен-ен, соопшти дека супстанцата е пронајдена во близина на влезот на приземјето на западното крило на Белата куќа.

Ова место го поминуваат голем број на луѓе, особено за време на викендите, кога се организираат тури низ Белата куќа, а посетителите, заедно со персоналот, имаат можност да направат обиколка на комплексот. Гостите поминуваат низ безбедносен преглед пред да влезат во Белата куќа, а потоа од нив се бара да ги остават своите телефони непосредно пред да влезат во западното крило на комплексот.

Кокаинот е пронајден во близина на местото каде што посетителите ги оставаат своите мобилни телефони.

Засега не е познато кој ја оставил дрогата, спакувана во мала кеса со патент, а Тајната служба ги проверува снимките од видеонадзорот да го открие идентитетот на лицето кое ја оставило супстанцата во Белата куќа.

По пронаоѓањето на материјата во неделата вечерта, Белата куќа беше привремено евакуирана.

Претседателот Џо Бајден не бил во комплексот во моментот кога бил пронајден кокаинот.