ХАВАНА (АА) – Куба синоќа ги негираше тврдењата дека Кина и администрацијата на Хавана се договориле да основаат база на островската земја за да ги шпионираат Соединетите Американски Држави (САД), јавува Анадолу.
„Вол Стрит Журнал“ вчера објави дека кубанските и кинеските власти постигнале договор за воспоставување објект за спроведување на она што е познато како собирање разузнавачки информации.
Карлос Фернандез де Косио, заменик-министер за надворешни работи на Куба, ги нарече тврдењата целосно „невистинити и неосновани“ и рече дека таквата вест е „злонамерно промовирана за да се оправда невиденото зајакнување на економската блокада, дестабилизација и агресија врз Куба“.
„Владата на Куба отфрла какво било странско воено присуство во Латинска Америка и Кариби, вклучително и многубројни американски воени бази и војници, а особено воената база што незаконски окупира дел од нашата национална територија во провинцијата Гвантанамо“, рече Де Косио.
САД, исто така, ги отфрлија тврдењата дека Кина постигнала договор со Куба за формирање шпионска база во островската држава.
„Не е точно дека Кина има план за воспоставување единица за електронско разузнавање во Куба, како што е објавено во ‘Вол Стрит Журнал (ВСЖ)’ повикувајќи се на американски претставници запознаени со доверливи разузнавачки информации“, изјави за новинарите портпаролот на Пентагон, Патрик Рајдер.
Извор: www.aa.com.tr
