13
Колумбија ја потресоа два тешки напади што за само неколку часа однесоа најмалку 13 животи и оставија десетици повредени зад себе. Властите ги опишуваат инцидентите како едни од најсериозните во последните години, а претседателот Густаво Петро јавно порача дека станува збор за „терористички дела“.
Првиот напад се случил во западниот град Кали, каде експлодирало возило-бомба пред Военото воздухопловно училиште „Марко Фидел Суарез“. Градоначалникот Алехандро Едер потврди дека најмалку пет лица загинале, а 36 се повредени. Веднаш беше воведена забрана за влез на големи камиони во градот од страв дека би можеле да следат нови експлозии. Овој напад доаѓа само неколку недели по тројни координирани бомбашки напади на 10 јуни, во кои загинаа седум лица, а над 50 беа повредени, исто така во Кали.
Истовремено, во северната општина Антиокија, полициски хеликоптер беше соборен од дрон натоварен со експлозив. Во експлозијата загинаа најмалку осум полицајци, а уште осуммина се повредени. Хеликоптерот превезувал персонал кој работел на искоренување на нелегални насади со кока листови во општината Амалфи, потврди претседателот Петро.
„Ова е тероризам. Она што се случи во Кали шири паника меѓу цивилите и е втор ваков настан за време на мојата влада“, изјави тој, додавајќи дека ваквите дела претставуваат „злосторства против човештвото“ и би можеле да бидат предмет на Меѓународниот кривичен суд.
Владините истраги упатуваат на тоа дека зад нападите стојат нарко-картелите и вооружените групи кои делуваат како дисиденти на ФАРК, предводени од Иван Мордиско, како и Заливскиот клан и групата Сегунда Маркеталија. Сите тие, според Петро, ја користат трговијата со наркотици за да финансираат терористички активности во земјата.
Овие последни настани уште еднаш ја разгореа дебатата во Колумбија за безбедноста, организираниот криминал и силното влијание на нарко-картелите, кои и по долгогодишните мировни процеси продолжуваат да ја држат земјата во постојан страв.
Извор: zurnal.mk
