Битола од 7 до 9 мај ќе биде домаќин на првото издание на Винскиот фестивал, кој ќе се одржи на платото пред Офицерски дом, најави градоначалникот Тони Коњановски.
Фестивалот ќе понуди спој на вино, музика и урбано дружење, со цел дополнително да се збогати културната понуда на градот и да се привлечат посетители од земјата и регионот.
„Очекувам прекрасни фестивалски денови, се надевам дека и времето ќе нè послужи. Со ова Битола уште еднаш се етаблира на туристичката мапа на Македонија како град на културата, отворен за посетители кои ги очекуваме во голем број, со една новина – Винскиот фестивал“, изјави Коњановски.
Програмата на фестивалот е конципирана како спој на различни музички жанрови и генерации. На сцената пред Офицерски дом ќе настапат повеќе домашни изведувачи, меѓу кои резидент диџеј, B52, „Пауза за ракија“, DJ Александар Јорданов, „Lockdown“, „Оркестар DIVA“, DJ Гоце Саф, „Zdrave Music“, „Љубојна“ и „Паркети“.
Покрај овој нов фестивал, беше најавено и дека Културниот и информативен центар – Битола (КИЦ Битола) годинава за првпат ќе биде организатор на Битолското културно лето „Битфест“, кое ќе се одржи по 18-ти пат.
Досега организатор на „Битфест“ беше Општина Битола во соработка со културните институции, а годинава КИЦ Битола ќе ја преземе улогата на организатор и реализатор на овој значаен културен настан.
Со новите содржини и настани, Битола продолжува да го развива својот културен идентитет и да се позиционира како една од водечките туристички и фестивалски дестинации во земјата.
