Министерството за економија и труд со измените на Законот за угостителство ја враќа Комисијата која ќе одлучува за доделување на лиценци за кабаре, ноќни клубови и дискотеки. Во оваа Комисија ќе членуваат претставници на повеќе институции, меѓу кои од пазарниот, санитарниот, трудовиот инспекторат, Управата за јавни приходи, МВР, Дирекцијата за заштита и спасување и од општината каде што е објектот. Лиценца ќе може да се издаде само откако сите претставници ќе стават потпис. А, за да се потпишат, сите надлежни институции ќе мора да достават написмено дека биле на терен и извршиле контроли, секој од својата надлежност.
„Меѓутоа, практично и објективно гледано, пазарните инспектори по професија се или правници, или се економисти. Како можат тие да проверат дали исполнуваа објектот, градежни, да речам, противпожарни услови, електрика и така натаму, се она што е поврзано со издавањето на одобрение за градба на еден објект и понатаму за исполнување на минимално технички услови“, изјави Марјан Ристески, заменик министер за економија и труд.
Целта на овие законски измени е да се отстранат недореченостите кои настанаа во 2008 година, кога со регулаторната гилотиња беа поедноставени процедурите за издавање лиценци. Во основа, ќе се дорегулира членот 21 од Законот и ќе се вметне задолжителна институционална проверка на тоа што подносителот на барањето за лиценца го приложил како документи.
„Не само пред време да се утврдат условите со попис од Комисијата и стручните лица, него понатаму и тој записник да влезе во понатамошна процедура и повторна контрола од страна на Секторот за угостителство односно соодветната институција, во случај е Министерството за економија и труд“, изјави Марјан Ристески, заменик министер за економија и труд.
Најавено е и дека ќе се заострат казните за сите кои не ги почитуваат законите, а се планира и воведување кривична одговорност.
„И сите кои стават потпис, ќе гарантираат со својот потпис, бидејќи и за лицата од Комисијата ќе има одредена, да речам, парична или друг вид на одговорност“, изјави Марјан Ристески, заменик министер за економија и труд.
Со регулаторната гилотиња во 2008 година, се смени Законот за угостителство и не се прецизираше во членот 21 дали надлежното лице во Министерството за економија по службена должност треба да ги провери сите документи кои се приложени. Поконкретно, дали инспекторатите биле на терен и реално ги провериле минимално – техничките, санитарните, за безбедност на работа, противпожарни и безбедносни услови.
ИЗВОР: ТВ 21
