Европската комисија работи на забрзување на исплатата на средствата за предфинансирање на Македонија во рамките на Планот за раст за Западниот Балкан, потврди портпарол на Комисијата за МИА.
– Службите на Комисијата го примија барањето за предфинансирање од Македонија и во моментот ги завршуваат процедуралните чекори за да се обезбеди исплатата што е можно побрзо во 2025 година, изјави портпаролот.
Портпаролот потсети дека Реформската агенда, која опфаќа клучни реформи во основните права и социо-економски политики, беше доставена од Македонија во јули 2024 година. Еврокомисијата ја оцени како усогласена со целите на Инструментот за реформи и раст за Западниот Балкан.
Агендата беше одобрена на 23 октомври 2024 година со Одлука за спроведување на Комисијата, откако доби позитивно мислење од земјите членки во рамките на Комитетот ИПА III. Земјите со одобрени реформски агенди, вклучувајќи ја и Македонија, имаат право да побараат до седум отсто од средствата како предфинансирање.
Планот за раст за Западниот Балкан предвидува шест милијарди евра инвестиции, со принцип на поврзување на инвестициите со реформи. Ова обезбедува постепен пристап до единствениот пазар на ЕУ и овозможува граѓаните од регионот порано да ги почувствуваат придобивките од европската интеграција, објасни портпаролот.
Според него, оваа иницијатива е патоказ за приближување на економиите на Западниот Балкан кон ЕУ и поттик за спроведување на неопходните реформи.
ИЗВОР: racin.mk
