„Доста беа лаги и неправди – слобода за невините“ – со вакви транспарентни измина протестниот собир во Кочани. Дел од присутните истакнаа дека има лица во притвор кои не се директно виновни за трагедијата и побараа да бидат пуштени на слобода. Особено, слобода се бараше за членовите на обезбедувањето на дискотеката кои, како што велат присутните, спасувале животи. Главната вина ја вперуваат кон сопственикот на „Пулс“.
„Ние сметаме дека треба да одговараат виновните, не сме овде за да не одговара никој од притворените. Таму добро ако погледнеме, знаеме дека има и виновни. Пред се е виновен сопственикот на дискотеката.“
Кочанчани побараа праведна истрага, а за ваквата цел се очекуваат и други собири ширум земјата.
„Ниту едно демократско право на изразување на мирни собири, не можеме ниту сме во насока на тоа да го стопираме, но исто така повторуваме дека повикуваме на разум, повикуваме на доверба во институциите дека ревносно се справуваме со сите состојби.“, вели Марија Митева.
Додека кочанчани бараат ослободување на дел од приведените, судот во градот ги одобри барањата на Обвинителството на сите осомничени да им биде одреден 30-дневен притвор. Меѓу нив се екс министерот Крешник Бектеши, поранешните директори на Пазарниот инспекторат и Дирекцијата за спасување, Горан Трајковски и Беким Максути. Во притвор остануваат и тројцата градоначалници на Кочани, вработени во обезбедувањето, ко-сопственици на дискотеката, вработени во повеќе институции, како и седум полицајци од Кочани и Штип.
Вкупно осомничени се 34 лица, но тројца не се во притвор поради здравствената состојба. Сите се сомничат за тешки дела против општата сигурност, а едно лице вработено во Министерството за економија се истражува за поткуп со кој била издадена лажната лиценца за работа на клубот. Од Обвинителството, но и полицијата, истакнаа дека ова била само прва фаза од истрагата и очекуваат списокот на осомничени да се проширува.
ИЗВОР: ТВ 21
