Украина ќе работи на враќање на целата територија и границите од 1991 г. и затоа мора да ја вратиме безбедноста на нашата територија но и да обезбедиме безбедно враќање на луѓето кои беа принудени да ја напуштат земјата, рече украинскиот претседател Володомир Зеленски за медиумите по крајот на состанокот на дводневниот НАТО Самит во главниот град на Литванија, Вилнус.
Тој кажа дека Украина ќе победи и ќе ги казни сите злосторства на руските вооружени сили, а воедно изјави и дека под ниту еден услов неговата земја нема да прифати „замрзнат конфликт“ со Русија бидејќи тоа на ниту еден начин не би значело победа за Украина.
Зеленски претходно изјави дека резултатите од самитот на НАТО се многу добри, но ќе биле идеални ако Киев добиел покана да се приклучи на западната одбранбена алијанса. Тој додаде дека е важно на Украина да не ѝ треба Акционен план за членство (МАП), бидејќи поранешната советска држава веќе направила многу за усогласување со стандардите на НАТО.
„Важен резултат е одлуката дека на Украина не и треба МАП на патот кон НАТО“,
рече Зеленски на заедничката прес-конференција со генералниот секретар на НАТО Јенс Столтенберг на самитот во Вилнус.
Тој рече дека украинските војници стекнале искуство во соработка со различни членки на Алијансата. Западните сојузници обучуваат илјадници украински војници, а Киев е силно зависен од западното оружје за да се бори против руските сили кои започнаа инвазија во февруари 2022 година.
НАТО вчера објави дека Украина ќе стане членка на Алијансата, но не постави краен рок. НАТО, исто така, одлучи дека Киев нема да мора да поминува низ МАП – список на политички, економски и воени критериуми што другите источноевропски земји требаше да ги исполнат на патот кон НАТО.
Зеленски рече дека во Вилнус добил позитивни вести за нови пакети воена помош од Велика Британија, Германија, Австралија и Холандија.
„Можеме да кажеме дека резултатите од самитот се добри, а да добиевме покана ќе беше идеално“,
изјави украинскиот претседател.
Извор: 360stepeni.mk
