Украинските власти бараат од Западот веднаш да реагира и да ги испрати бараните стотици тенкови и оклопни возила, бидејќи Герасимов, новиот командант на сите руски сили во Украина, се подготвува за ангажирање на 150.000 резервисти што беа мобилизирани есенва.
Рускиот залет се должи на успехот што го има во Соледар, инаку целосно небитно гратче од 10.000 жители во близина на Бахмут, за кој дадоа илјадници жртви. Балансот на жртви не беше ништо помилозлив ни на украинска страна.
„Во руските регионални центри за регрутација се случуваат сериозни подготовки.
Кремљ има спроведено свои анкети кои покажуваат дека просечниот Русин е анкциозен околу војната, ама исто така не е подготвен да толерира пораз,“ изјавил неименуван западен функционер за британски Телеграф.
Моментално бројот на војници што Русија и Украина го имаат на фронтот е израмнет, а западните функционери проценуваат дека на Герасимов ќе му требаат три пати повеќе војници отколку што имаат Украинците за да почне да освојува територија наместо само да ја брани.
Додека Британија најави дека ќе испрати 14 Челенџер 2 тенкови, а Полска уште толку Леопард 2 тенкови, првиот човек на вооружените сили на Украина, генерал Залужниј, тврди дека на Киев во моментов му требаат најмалку 300 тенкови и уште 600 до 700 оклопни возила за да ја врати целата своја територија и да ја порази Русија.
Бројката што ја бара Залужниј и во дел од Западните престолнини не се смета за „неразумна“. Така британскиот генерал Ричард Баронс, порача дека 14 Челенџер 2 тенкови се доволни за да се освои „ова или она село, ама не и двете“. Според него најдобрата верзија е Украинците да почекаат до следната година и да ја создадат најголемата можна офанзивна војска со 500 тенкови, што би било „гејм овер“ за Русите, меѓутоа признава дека во реален свет тоа не е изводливо и Украинците немаат толку време за чекање.
Воените експерти со кои разговара Телеграф веруваат дека на пролет Русија ќе започне со офанзива на неколку страни, за да го олесни притисокот на украинската војска врз Доњецк и Луганск. Претпоставката е дека еден од нападите овој пат ќе тргне на север од Белорусија, а друг за прв пат ќе биде врз Одеса. Западните експерти не очекуваат дека овие офанзиви ќе успеат да и донесат нови територии на Русија, но затоа значително ќе ги истоштат украинските ресурси кои сега се фокусирани на Донбас.
ИЗВОР: off.net.mk
