„Има огромни очекувања од овие авиони. И ние веројатно ќе мора да бидеме пореалистични. Ф-16 секако ќе имаат влијание, меѓутоа нема да сменат нешто драстично. Ниту месецов, ниту во претстојните месеци,“ изјавува командантот на данските воздушни сили, Јан Дам.
Тој објаснува дека неопходно е долгогодишно градење на украинските воздушни сили, снабдување со правилна муниција и адаптирање на комплицирани воени мисии, пред авионите да бидат вистински ефикасни на военото поле.
„Мојата препорака за Украинците е да станат вистински добри во користење на овие авиони пред да почнат да ги изведуваат ризични мисии.
За ова разговарам и со првиот човек на украинските воздушни сили,“ објаснува Дам.
Генералот очекува дека авионите ќе имаат посебно силно влијание на кревање на моралот на Украинците, и дека новите пилоти ќе имаат основни вештини за воздушни борби и ракетни напади на воздух-земја.
„Меѓутоа ним и понатаму ќе им треба многу обука во Украина. И може да трае месеци и години, пред тие да постигнат одлучувачки ефект,“ смета генералот.
Обуката за пилоти на Ф-16 трае меѓу три и четири години, наспроти нив е обуката што ја минуваат Украинците која е компресирана на шест до осум месеци.
До крајот на годината ќе бидат обучени 20 украински пилоти, плус некои си 100 Украинци за помошни задачи како механичари, експерти за оружје и персонал во воените бази. Од овие 100, првите 50 ја имаат завршено обуката и се вратени назад за да работат на подготовка на базите за пристигнување на првите авиони.
Процената на Дам е дека Ф-16 не се доволни за постигнување на воздушна доминација над Украина, туку за тоа треба општо поефикасна авијација и одбранбени системи од земја.
Дам потсетува на руската најава дека соборувањето Ф-16 ќе има највисок приоритет, што би било од огромно значење за руската пропаганда и моралот на војниците.
Данска првично планира да ги испорача своите Ф-16 во јануари, меѓутоа наидува на проблеми главно заради јазикот.
„Моравме неколку пати да ја промените и адаптираме нашата програма за обука. Делумно и затоа што познавањето на англискиот јазик кај украинските пилоти беше полошо отколку што очекувавме,“ изјавува Дам, кој објаснува дека заради тоа дел од пилотите се испратени на курс во САД пред да продолжат со обуката во Данска.
ИЗВОР: off.net.mk
