Цените на прехранбените производи нека се објавуваат на веб-страниците на маркетите како што предложи Владата, но нека се објавуваат реалните цени. Ова го велат граѓаните кои и понатаму се жалат на енормните поскапувања низ маркетите.
Владата на поплаките на граѓаните одговори со низа нови мерки што се разгледуваат – како ограничување на трговските маржи од 10% до 30 април, а на маса е и идејата за воведување „дополнителна кошничка“ со основни производи по пониски цени, како и објавување цени на веб-страниците на супермаркетите.
Претставници на Стопанската комора на трговци на големо и мало, претежно со прехранбени и непрехранбени производи, имале средба со владата. Добиле покана за средба откако се заканија дека ограничувањето на маржата на максимум 10% ќе донесе до затворање на маркети и отпуштање на вработени. На денешната средба немало никаков договор, ќе треба да се сретнат и утре.
Инаку, опозициската СДСМ предложи група од 7 мерки за кои смета дека ќе го подобрат животниот стандард на граѓаните. Меѓу мерките се намалување на ДДВ на сметките за струја и храната, замрзнување на придонесите во приватниот сектор и зголемување на платите, како и намалување на цената на зелените картони. Ова уследи по извештајот на Државниот пазарен инспекторат кој покажа дека маржата за основните прехранбени производи како леб, млеко и масло за јадење во супермаркетите е над 20%, а за основните непрехранбени производи е 30%. Поголеми маржи се констатирани кај увозниците-дистрибутери кои достигнуваат и до 50%. Податоците на Конфедерацијата на синдикати на Македонија покажуваат дека минималните основни трошоци во јануари се зголемени за 391 денар во однос на претходниот месец.
ИЗВОР: ТВ 21
