Случајот со уапсените поранешните полициски службеници вмешани во акцијата во Грчец отвора докази и за многу други предмети. Министерот за внатрешни работи Панче Тошковски вели дека Јавното обвинителство работи на доказите, кои, како што рече е обемен материјал што наскоро ќе отвори нови случаи.
„Во рамки на доказниот материјал кој што се анализира од страна на Јавното обвинителство за гонење на организиран криминал и висока корупција постојат навистина обемен број на докази. Сите оние докази кои што се анализираат се прибавени од онаа СКАЈ апликација која што ни е дадена од страна на нашите меѓународни партнери, така што сметам дека во иднина ќе има доста интересни случаи за јавноста а поврзани со организиран криминал и висока корупција“, вели Панче Тошковски.
Тошковски не сакаше да прецизира дали случаите што ќе следат се со дела поврзани со овој или за сосема други и дали се работи повторно за службеници од МВР. Во случајот се уапсени три лица од кои двајца поранешни главни инспектори за недозволена трговија со дрога кои пренесувале информации на криминалната група од скопски Грчец.
„Овој случај е поврзан со двајца полициски службеници во периодот кога ги сториле кривичните дела за кои што се теретат, кои што денеска не се повеќе полициски службеници, но во рамки на информациите кои што ги имам станува збор за огромен број на докази поврзани со конкретни кривични дела. Претпоставувам дека во иднина ќе следат поголем број на случаи кои што се поврзани со доказниот материјал обезбеден од страна на СКАЈ апликацијата“, вели Панче Тошковски.
Пензионираните инспектори доставувале информации до групата од Грчец уште од 2019 година кога известиле за примената на посебни истражни мерки и дека полицијата ќе прави рација поради што пропаднала полициската акција против оваа група. Во наредниот период ги известувале и за двојното убиство во скопско Чаир за тоа кој е приведен и што изјавил во полициска станица, а за се ова биле добро платени. Обвинителството очекува од судот да им изрече мерка притвор.
ИЗВОР: ТВ 21
