Десетици илјади Руси се преселија во Казахстан минатата година, откако Москва ја започна првата воена мобилизација по Втората светска војна за го заголеми бројот на своите сили во војната во Украина
Казахстан повеќе нема да им дозволува на руските граѓани да останат во оваа централноазиска земја на неодредено време и најави воведување на визни контроли на секои три месеци, јави Ројтерс, повикувајќи се на директива од владата на земјата.
Според директивата, властите во Астана од 26 јануари ќе воведат пракса со која од Русите и граѓаните на другите членки на Евроазиската економска унија ќе се бара да ја напуштат земјата најмалку 90 дена по нивниот тримесечен престој.
Од министерството за внатрешни работи на земјата, кое ја предложило реформата, рекле дека мерката ќе ѝ даде на државата поголема контрола врз миграциските текови.
Десетици илјади Руси се преселија во Казахстан минатата година, откако Москва ја започна првата воена мобилизација по Втората светска војна за го заголеми бројот на своите сили во војната во Украина.
Во Казахстан нашироко се зборува рускиот јазик, а двете земји ја делат најдолгата копнена граница во светот, што ја прави оваа земја популарен избор меѓу Русите кои одбиваат да учествуваат во војната.
Според казахстанските власти, земјата се бори со последиците од доаѓањето на голем број руски мигранти. Инфлацијата минатата година се искачи на повеќе од 20 отсто, што е највисока од 1990-тите години на минатиот век.
Војната во Украина, исто така, ги затегна врските меѓу Москва и Астана, бидејќи Казахстан одби да ја поддржи инвазијата и повика на мир, наведува Ројтерс.
Извор: 360stepeni.mk
