Министерот Тошковски и Министерството за внатрешни работи треба да излезат со сите детали за тоа како се дозволи Артан Груби да избега од државата, во спротивно се дава основа на тврдењата дека бегството на Артан Груби е директен политички договор помеѓу ВМРО-ДПМНЕ и ДУИ, рече заменик-претседателката на СДСМ, Фани Каранфилова Пановска во емисијата „Само вистина“ на Канал 5.
„Такви индиции за нивна политичка соработка веќе подолго време се очигледни и со тоа што се случува во Собранието, а и со тоа што се случува надвор од институциите и Собранието, со сите оние обиди де факто или наводно да се дестабилизира нашава држава со сите меѓуетнички тензии, коишто беа предизвикани“, истакна Каранфилова Пановска.
Таа истакна дека Груби ја поминал северната граница со Косово, покажувајќи ги своите патни исправи, а при тоа службеникот којшто е на смена, не го проверил, иако има веќе забрана за премин на границата, а другите службениците, на граничниот премин имаат на себе камери кои во тој момент немаат батерии, односно камерите не работат.
„Факт денеска е дека Артан Груби не е во државата, факт е дека Артан Груби два дена откако е поднесена кривичната пријава исчезнува, дека слободно ја поминува границата и премногу сомнежи дека тоа не е случајно“ рече Каранфилова Пановска.
Таа додаде дека раководител на контролата на границата во тој момент бил човек, којшто е од доверба на министерот Тошковски, именуван на таа функција минатиот месец, со решение и дека од следниот ден по заминувањето на Груби, тој е на боледување.
ИЗВОР: racin.mk
